اصلی خوبی - بادشاہ اور بونے شہزادے کی کہانی
ایک بادشاہ کے کئی بیٹے تھے۔ اُن میں ایک چھوٹے قد اور معمولی
شکل و صورت کا تھا اور اس وجہ سے اسے اپنے باپ کی ویسی توجہ
اور شفقت حاصل نہ تھی جیسی اس کے دوسرے بھائیوں کو حاصل تھی۔
ایک دن بادشاہ نے اس پر نظر حقارت ڈالی تو شہزادے کا دل بے قرار
ہو گیا۔
بونے شہزادے نے اپنے باپ سے کہا۔ بے شک انسان کی شکل صورت
بھی لائق توجہ ہوتی ہے لیکن سچ یہ ہے کہ انسانیت کا اصلی جو ہر انسان کی
ذاتی خوبیاں اورحسن سیر ت ہے۔
"آدمیت سے ہے بالا آدمی کا مرتبہ
پست ہمت یہ نہ ہو، گو پست قامت ہو تو ہو"
پس اے والد محترم، حقیر جان کر مجھے نظر انداز نہ فرمائیے بلکہ میری
ان خوبیوں پر نظر ڈالیے جو اللہ پاک نے مجھے بخشی ہیں۔
اپنے بھائیوں کے مقابلے میں بیشک میں پست قامت ہوں، لیکن خدا نے
اپنے خاص فضل سے مجھے شجاعت کی خوبی بخشی ہے۔ دشمن مقابلے پر آئے
تو اس پر شیر کی طرح جھپٹتا ہوں اور اس وقت تک میدان جنگ سے باہر
قدم نہیں نکالتاجب تک دشمن کو بالکل تباہ نہ کر دوں۔
بادشاہ نے اپنے بونے بیٹے کی ان باتوں پر غور کرنے کی ضرورت محسوس نہ کی
وہ یوں مسکرایا جیسے کسی نادان کی بات سن کر مسکراتے ہیں۔ اس کے
بھائیوں نے کھلم کھلا اس کا مذاق اڑایا۔
خیر بات آئی گئی, یہ شہزادہ پہلے کی طرح زندگی گزارتا رہا۔ لیکن پھر خدا کا کرنا
کیا ہوا کہ طاقت ور پڑوسی بادشاہ نے اس بادشاہ کے ملک پر حملہ کر دیا۔
عیش و عشرت میں زندگی گزارنے والے شہزادے تو اس فکر میں پڑ گئے کہ
اب ان کی جانیں کسی طرح بچیں گی۔لیکن چھوٹے قد والا شہزادہ اپنے
گھوڑے پر سوار ہو کر دشمن کے لشکر میں جا گھسا اور اپنی تیز تلوار سے کتنے ہی
سپاہیوں کوقتل کر دیا۔
بادشاہ کو اس کی شجاعت کا حال معلوم ہوا تو اس کا بھی حوصلہ بڑھا اور وہ
مقابلے کے لیے نکلا۔
حملہ کرنے والے بادشاہ کے سپاہیوں کی تعداد بہت زیادہ تھی۔ گھمسان کی
لڑائی شروع ہونے کے بعد دشمن کا دباؤ بڑھنے لگااور بادشاہ کی فوج کے سپاہی
اپنی صفیں توڑ کر بھاگنے لگے تو بونے شہزادے نے یہ حالت دیکھی تو وہ گھوڑا
بڑھا کر آگے آیا اور بھاگنے والوں کو غیرت دلائی بہادرو! ہمت سے کام لو اور
دشمن کا خاتمہ کر دو۔
شہزادے نے سپاہیوں سے کہا کہ یاد رکھو میدان جنگ سے بھاگنے والے مرد
کہلانےکے حق دار نہیں۔ انھیں عورتوں کا لباس پہن کر گھروں میں بیٹھ
جانا چاہیے۔
شہزادے کی تقریر سن کر بھاگتے ہوئے سپاہی پلٹ آئے اور غصے میں بھر کر
انھوں نے ایسا زور دار حملہ کیا کہ دشمن فوج میدان جنگ سے فرار ہونے پر
مجبور ہو گئی۔
بادشاہ اپنے بیٹے کی بہادری دیکھ کر بہت خوش ہوا۔ اس نے اس کی خوب
تعریف کی اور اعلان کر دیا کہ ہمارے بعد ہمارا یہی بیٹا تاج اور تخت کا
مالک ہو گا۔
شہزادے کے ولی عہد بن جانے کی سب کو خوشی ہوئی۔ لیکن اس کے بھائی
حسدکی آگ میں جلنے لگے۔ اور انھوں نےبونے شہزادے کو راستے سے ہٹانے
کا فیصلہ کر لیا۔
یہ فیصلہ کرنے کے بعد انھوں نے بہادر شہزادے کی دعوت کی اور کھانے میں
زہر ملا دیا۔
اتفاق سے یہ بات شہزادی کو معلوم ہو گئی۔ جب شہزادہ کھانا کھانے لگا تو
شہزادی نے کھڑکی سے اشارہ کیا کہ یہ کھانا نہ کھانا ۔
صورت حال سے آگاہ ہو کر بہادر شہزادے نے کھانے سے ہاتھ کھینچ لیا
اور اپنے حاسد بھائیوں سے کہا، مجھے یہ عزت میری خوبیوں کی وجہ سے
حاصل ہوئی ہے۔ اگر میں مر بھی جاؤں تو تم میری جگہ نہ لے سکو گے
کیونکہ تمھارے اندر کوئی بھلائی نہیں۔
اگر ہما دنیا سے نابود بھی ہو جائے پھر بھی کوئی الّو کے سائے کو پسند
نہ کرے۔
بادشاہ کو اس بات پتا چلا تو اس نے حاسد شہزادوں کو بہت ڈانٹا اور پھر
اس فساد کو ختم کرنے کے لیےیہ تدبیر کی کہ شہزادوں کی تعداد کے مطابق
ملک کو حصوں میں بانٹ کر ایک ایک شہزادے کو ایک ایک حصے کا
مالک بنا دیا۔ بہادر شہزادے نے اس فیصلے کو دل سے قبول کر لیا
بقول شاعر
ایک نان خشک بھی پائے اگر مرد خدا
بانٹ کر کھائے اسے، یہ ہو گی اسکے دل میں چاہ
اوڑھ لیں گے ایک گدڑی ملک کے کتنے ہی فقیر
رہ نہیں سکتے مگر اک ملک میں دو بادشاہ
حاصل کلام
اس حکایت میں سچی کامیابی اور حقیقی مسرت حاصل کرنے کے دو اہم گر
بتائے ہیں۔ پہلا یہ کہ صحیح معنوں میں کامیابی وکامرانی انسان کی اعلیٰ ذاتی
صفات سے حاصل ہوتی ہے ۔جیسا کہ بونا شہزادہ اپنےبڑے قد اور خوبصورت
بھائیوں کے مقابلے میں بہادری کے باعث کامیاب ہو گیا۔
دوسرے یہ کہ سچی راحت اسی وقت حاصل ہوسکتی ہے جب انسان اپنے
حق کی حفاظت کرنے کے ساتھ دوسروں کے حقوق بھی تسلیم کرے اور
اپنے دل اور دماغ کر حرص سے پاک کرے، جیسا کہ درویشوں کا دستور ہے۔
مزید کہانیاں:
